Ushbu maqola Samarqand viloyatida tarqalgan yuksak o‘simliklarning patogen mikromitsetlarini o‘rganishga bag‘ishlangan bo‘lib, ularning taksonomik tahlili va xo‘jayin o‘simliklarining ro‘yxati keltirilgan. Mikologik tahlillarga ko‘ra, ushbu hududda 36 tur, 5 forma, 3 variatsiya mikromitset zamburug‘lar 37 tur o‘simliklarda uchrashi va patogenlik qilishi aniqlandi. Tahlillar natijasida 36 tur, 5 forma, 3 variatsiya mikromitset zamburug‘lar 3 bo‘lim, 8 tartib, 13 oila, 20 turkumga mansubligi aniqlandi. Olib borilgan morfologik, mikroskopik, diagnostik va taksonomik tahlllilarga ko‘ra aniqlangan turlar orasida Ascomycota bo‘limiga mansub turlarning ko‘pligi, shuningdek Basidiomycota bo‘limi vakillari keng tarqalganligi aniqlandi.